Góð opnun á urriðasvæðunum í Laxá

Veiði er hafin á urriðasvæðunum í Laxá og þrátt fyrir morgunverk veiðimanna sem fólust í því að skafa snjó af bílunum var veiðin góð.

Veiðin fór fínt af stað í Laxárdalnum og Mývatnssveitinni þrátt fyrir að kuldi og norðanátt gerðu vistina aðeins erfiðari. Í Laxárdalnum veiddust um 50 sérstaklega vel haldnir urriðar. Meðalvigtin var há og urriðinn óvenju  kviðsiginn miðað við árstíma. Í Mývatnssveitinni veiddust um 240 urriðar. Fiskarnir á efra svæðinu koma líka mjög vel undan vetri. Það voru fiskar skráðir til bókar á öllum svæðum og menn létu vel af vistinni þrátt fyrir norðanbarninginn. Stærstu fiskarnir á svæðunum voru um 65 cm og fiskarnir tóku bæði púpur og straumflugur á víxl samkvæmt vef SVFR.

Spáin framundan er svipuð og hefur verið síðustu daga svo veiðimenn þurfa að búa sig eins og um haustveiði væri að ræða.  Veiðin á landinu er vonandi víðar að komast í gang en kuldinn hefur haft mikil áhrif á bráð og veiðimenn og nokkuð víst að lónbúinn sem og veiðimaður, já og líklega landsmenn allir, bíða með óþreyju eftir sumri.