"Við þurfum fleira fólk út að hjóla"

Hjólaástundun Íslendinga hefur aldrei verið meiri en nú og sífellt fleiri kjósa þennan vistvæna og heilsusamlega ferðamáta. Hið frábæra verkefni Hjólað í vinnuna fer af stað í næstu viku og við hittum því Sesselju Traustadóttur hjá Hjólafærni sem eru fræðasamtök um samgönguhjólreiðar. Hjólafærni í samvinnu við ýmis fyrirtæki og Reykjavíkurborg kynnti í vikunni nýtt samfélagsverkefni sem kallast Hjólabætum Ísland í samvinnu við Strætó en þar er vakin athygli á táknmáli götunnar.

Hjólreiðafólk er hvatt til að merkja hjólatengdar myndir og stöðuuppfærslur með myllumerkinu #hjolamal á samfélagsmiðlum 

Hlaupasumarið byrjaði með trompi

Hlaupasumarið byrjaði aldeilis með trompi á sumardaginn fyrsta en þá var haldið 100. Víðavangshlaup ÍR. Þátttakendur voru um 1200 talsins en það rúmlega tvöföldun frá því í fyrra og samkeppni því ansi hörð.

Á laugardaginn var Vormaraþon Félags maraþonhlaupara haldið í mikilli blíðu og var bæði keppt í heilu og hálfu maraþoni. Hlaupið var ræst í Elliðárdalnum og leiðin lá um Fossvogsdal, Nauthólsvík og allaleið að snúningspunkti á Ægissíðu og til baka en maraþonhlauparar fara leiðina tvisvar.