Fjórða jafntefli Rúnars í sex leikjum

Lilleström, lið Rúnars Kristinssonar, gerði sitt fjórða jafntefli á tímabilinu er liðið mætti Vålerenga í dag. Lokatölur voru 1-1.

Liðið hefur því gert jafntefli í fjórum af sex leikjum sínum til þessa á tímabillinu og er í tíunda sæti deildarinnar af sextán liðum með sex stig.

Johan Andersson skoraði mark Lilleström úr víti en Finnur Orri Margeirsson og Árni Vilhjálmsson voru báðir í byrjunarliði Lilleström og léku allan leikinn. Elías Már Ómarsson var á bekknum hjá Vålerenga og kom ekki við sögu.

Í Danmörku hafði FCK betur gegn Esbjerg, 2-1. Björn Bergmann Sigurðarson og Rúrik Gíslason voru báðir í byrjunarliði FCK en teknir af velli undir lok leiksins.

FCK er sem fyrr í öðru sæti deildarinnar, níu stigum á eftir Midtjylland sem á leik til góða og átta stigum á undan Bröndby.

Malmö hafði betur gegn Helsingborg, 3-1, í sænsku úrvalsdeildinni. Guðlaugur Victor Pálsson var í liði Helsingborg sem er í áttunda sæti deildarinnar.