Berst ekki aftur við gunguna Pacquaio

Floyd Mayweather er hundfúll út í Manny Pacquaio og hefur aftekið með öllu að berjast aftur við hann.

Mayweather hafði betur gegn Pacquaio í hringnum um síðustu helgi en síðar kom í ljós að Pacquaio hefði verið meiddur á öxl. Hann kvartaði síðan yfir ýmsu öðru.

„Var ég búinn að segja að ég væri klár í annan bardaga? Já, það er rétt en mér hefur snúist hugur. Ég vil ekki keppa við hann því hann er tapsár gunga og kann ekki að tapa. Hann gat ekki tekið tapinu og viðurkennt að ég hafi verið betri," sagði Mayweather pirraður.

„Hann er með endalausar afsakanir og ég vil ekki að almenningur sé að kaupa þetta kjaftæði í honum. Hann tapaði, hann veit að hann tapaði sanngjarnt. Ég hef tapað mikilli virðingu fyrir honum eftir þetta."

Pacquaio er búinn að fara í aðgerð vegna meiðslanna og verður frá út árið. Mayweather ætlar að hætta í september þannig að annar bardagi hefði líklega aldrei komið til greina.