Ísland í áttunda sæti yfir prúðustu fótboltaþjóðir Evrópu

Þrjú lönd fá auka sæti í Evrópudeild UEFA í fótbolta á næsta tímabil þökk sé prúðmennsku liða þeirra inn á vellinum. Ísland var fimm sætum frá því að fá aukasæti.

Það verða Holland, England og Írland sem fá aukasæti í Evrópudeildinni 2015-2016 en sætið fer til prúðasta liðsins í hverri deild. Ef það lið er meðal þeirra sem hafa þegar tryggt sér Evrópusætið fer sætið til næsta liðs í töflunni.

Norðmenn hafa áður fengið þetta sæti en Noregur er nú í 7. sæti listans, einu sæti á undan Íslandi en á eftir fyrrnefndum þremur þjóðum auk Finnlands, Danmerkur og Þýskalands.

Ísland er í 8. sæti með 8.089 stig en Hollendingar voru efstir með 8.151 stig. Englendingar voru með 8.146 stig og Írar 8.144 stig.

Það eru hinsvegar Albanir sem eru í 48. og síðasta sæti prúðmennskulistans en á listann komust aðeins þær þjóðir sem hafa spilað meira en 37 leiki. Íslensku liðin spiluðu 53 leiki.  

Það er hægt að sjá allan listann með því að smella hér.