Tinder og Instagram í eina sæng

Tinder og Instagram hafa leitt saman hesta sína en nýjasta uppfærsla stefnumótaappsins leyfir nú notendum að vísa beint á Instagram síðu sína. Þegar það er gert birtast þrjátíu og fjórar nýjustu myndir notandans. Er þetta gert til þess að auka líkur á því að notendur í leit að ást velji að „swipe-a“ til hægri en það merkir að þér líki við manneskjuna og hafir ef til vill áhuga á frekara spjalli. Ef þú hefur ekki áhuga velurðu að „swipe-a“ til vinstri eða draga myndina til vinstri. Allt þetta er vel útskýrt í kynningarmyndbandi frá Tinder sem sjá má hér að neðan.

Myndbandið er gert af Magna Carta, framleiðslufyrirtæki sem hefur séð um að gera mikið af auglýsingum fyrir Tinder. „Við vildum skoða þetta fyrirkomulag þar sem Instagram er notað eins og félagsleg dagbók, skrifuð af notandanum, fjölskyldu hans eða hennar og af vinum,“ sagði Maximilian Guen , stofnandi Magna Carta. „Með því að nota myndavélina eins og karakter gátum við myndað ákveðna nánd. Ég vildi að áhorfendur væru þarna með stelpunni okkar, til að kynnast henni og falla fyrir henni.“

Samkvæmt Tech Times er markmið uppfærslunnar að auki að minnka grunnhyggnina sem smáforritið hefur verið gagnrýnt fyrir þar sem notendur geta nú myndað sér skoðun á öðrum notendum sem byggist á öðru heldur en útlitinu einungis. „Þessi breyting mun gefa notendum betri skilning á því hvernig manneskjan er sem þú ert að tala við,“ sagði annar stofnenda Tinder og forstjóri Sean Rad. „Þetta er bara fyrsta skrefið af mörgum til þess að taka forritið á næsta stig og hjálpa þér, notandanum, að meta manneskjuna sem þú tengist við og hjálpa notendum að hefja samtal. Ef við getum gefið notendum okkar viðeigandi upplýsingar fyrir hvern notanda getum við tekið þá hálfa leið að því að hefja samtal.“