Auglýsingar á Youtube sagðar „blekkjandi og ósanngjarnar gagnvart börnum“

Bandarísk neytendastamtök hafa sent Alríkisviðskiptastofnun Bandaríkjanna (FTC) kvartanir vegna auglýsinga í forriti Youtube fyrir börn, sem gengur undir nafninu „Youtube Kids app“. The Verge greinir frá.



Google, eigandi Youtube, er sagt brjóta reglur um sjónvarpsútsendingar með því að afmá mörkin milli auglýsinga og annars efnis. Athæfið er sagt „blekkjandi og ósanngjarnt gagnvart börnum.“

Í kvörtuninni er því haldið fram að mörg myndbönd í forritinu séu af einstaklingum sem opna umbúðir af vörum og mæla svo með vörunum. Til að mynda sé þetta stundað af dótturfyrirtæki Disney, Maker Studios. Þetta brjóti í bága við reglur um auglýsingar en skýrt þarf að taka fram séu einhver fjárhagsleg tengsl milli fyrirtækja og varanna sem þau birta í myndböndum.

Youtube segir í tilkynningu að fyrirtækið eigi í miklu samstarfi við foreldra og hagsmunaaðila og sé alltaf tilbúið að skoða leiðir hvernig bæta megi rásina.