FH vill ekki staðfesta neitt

Formaður handknattleiksdeildar FH, Ásgeir Jónsson, vildi hvorki neita því né játa í samtali við Vísi í dag að leikmaður liðsins hefði fallið á lyfjaprófi eftir bikarúrslitaleik ÍBV og FH þann 28. febrúar.

Ásgeir sagðist ekkert vilja tjá sig um málið yfir höfuð. Verið væri að fara yfir stöðuna í málinu og ekkert kæmi frá FH fyrr en allt lægi fyrir.

Það var Morgunblaðið sem greindi frá þessu í morgun og er umræddur leikmaður sagður hafa játað brot sitt.

Leikmaðurinn er sagður hafa notað stera og hann á því væntanlega yfir höfði sér tveggja ára keppnisbann.

Aðrir leikmenn FH verða svo í eldlínunni á Ásvöllum í kvöld er þeir berjast fyrir lífi sínu í úrslitakeppni Olís-deildarinnar.

Leikurinn hefst klukkan 19.30 og verður í beinni textalýsingu á Vísi.