Allt sem þú þarft að vita um sólmyrkvann: Nær hámarki klukkan 9:37

Það hefur varla farið framhjá neinum að í dag var sólmyrkvi sem sást frábærlega á Íslandi.

Hægt var að fylgjast með sólmyrkvanum í beinni útsendingu á Vísi. Í spilaranum hér fyrir ofan er hægt að sjá myrkvann í heild sinni á tíu mínútum.

Vísir tók saman nokkra fróðleiksmola um myrkvann en Stjörnufræðivefurinn hefur tekið saman mikið af upplýsingum um hann.

• Sólmyrkvi verður þegar tunglið gengur milli sólar og Jarðar og myrkvar þannig sólina að hluta eða í heild séð frá Jörðinni.
  
  
• Sólmyrkvinn mun standa yfir í um tvo klukkutíma. Hann hefst í Reykjavík klukkan 8:38 og nær hámarki sínu klukkan 9:37. Annars staðar á landinu getur munað einni til tveimur mínútum til eða frá.
  
  
• Sólmyrkvinn er almyrkvi sem stendur lengst í 2 mínútur og 47 sekúndur. Almyrkvi sést í Færeyjum og á Svalbarða en ferill hans liggur um 70 kílómetra austur af suðausturhluta Íslands.
  
  
• Á Íslandi sést deildarmyrkvi. Í Reykjavík hylur tunglið 97,5% sólar en 99,4% á Austurlandi. Um er að ræða mesta myrkva sem sést hefur hér á landi frá almyrkva sem varð 30. júní 1954.
  
  
• Góðar horfur eru á að vel muni sjást til sólmyrkvans á suðaustur,- suðvestur- og vesturhluta landsins en að skýjahula muni birgja sýn frá Húnavatnssýslu og austur til Austfjarða. Reyndar er skýjabakki að nálgast suðvesturströndina en líklega mun hann ekki spilla sýn, að mati veðurfræðings á vakt. Hér má fylgjast með skýjahuluspá Veðurstofunnar.
  
  
• Augnlæknar vara fólk sterklega við því að horfa til sólu án sérstakra sólmyrkvagleraugna en öll grunnskólabörn landsins fengu slík gleraugu að gjöf frá Stjörnuskoðunarfélagi Seltjarnarness.
  
  
• Eigi fólk ekki sólmyrkvagleraugu, sem eru löngu uppseld á landinu, má horfa á myrkvann í gegnum rafsuðugler eða filmur.
  
  
• Þá er ekki ráðlagt að beina myndavél eða síma beint í sólina til að taka mynd án þess að nota sólarsíur eða rafsuðugler, þar sem það getur verið slæmt fyrir augun og skemmt linsuna í vélinni eða símanum.
  
  
• Sólin er lágt á lofti nú í morgunsárið og því er vert að gæta að því að byggingar og fjöll skyggi ekki á sólina vilji fólk fylgjast með myrkvanum.
  
  
• Stjörnuskoðunarfélag Seltjarnarness verður fyrir framan Aðalbyggingu Háskóla Íslands og mun fylgjast með sólmyrkvanum þaðan með sjónaukum sínum.
  
  

Fjölmargir fjölmiðlar voru með sólmyrkvann í beinni frá ýmsum löndum og var hægt að fylgjast með útsendingum þeirra á netinu.

Kringvarp Foroya sýndi frá Færeyjum.

Stjörnuskoðunarfélagið Slooh sýndi frá Skotlandi.

NRK sýndi frá Svalbarða.

Háskólinn í Nottingham sýndi frá þaki skólans.

Gervihnöttur Evrópsku geimvísindastofnunarinnar, Proba 2, sem er á sporbaug um jörðu, náði þessum myndum af sólmyrkvanum.

Post by Ásatrúarfélagið.

Post by Háskóli Íslands.