Boðar ekki gott fyrir Indians að vera á forsíðunni

Stuðningsmenn hafnaboltaliðsins Cleveland Indians eru æfir út í íþróttablaðið Sports Illustrated.

Ástæðan er sú að blaðið spáir því að Indians muni vinna deildina í ár og þar af leiðandi voru tveir leikmenn liðsins settir á forsíðu.

Indians hefur ekki orðið meistari síðan 1948 og stuðningsmenn liðsins eru hjátrúarfullir.

Síðast þótti liðið líklegt til þess að fara alla leið árið 1987. Þá voru þeirra menn settir á forsíðuna og allt fór til fjandans.

Indians lauk keppni með árangur upp á 61 sigurleik og 101 tap. Liðið varð í neðsta sæti Amueríkudeildarinnar það ár og hefur blaðinu meðal annars verið kennt um gengið af stuðningsmönnum.

Stuðningsmenn eru þess vegna á nálum eftir útgáfu nýjasta blaðsins. Leikmenn eru þó í rónni og segjast ekki trúa á „jinx".