Morkunas, Morkunas, Morkunas! | Sjáðu Litháann loka á Stjörnuna

Haukar eru í fimmta sæti Olís-deildar karla í handbolta eftir stórsigur á nýliðum Stjörnunnar, 28-16, í Mýrinni í Garðabæ í gærkvöldi.

Gestirnir úr Hafnarfirði voru fimm mörkum yfir í hálfleik, 12-7, og var leikurinn aldrei spennandi í seinni hálfleik enda gátu Stjörnumenn varla keypt sér mark.

Haukar spiluðu gríðarlega sterkan varnarleik í síðustu umferð gegn FH þegar þeir unnu stórsigur í Hafnafjarðarslagnum. Markvörður liðsins, Litháinn Giedrius Morkunas, blómstraði í þeim leik sem og í gær.

Morkunas var nær ósigrandi í markinu í gærkvöldi eins og sést á markafjölda heimamanna. Litháinn varði 22 skot eða 61 prósent þeirra skota sem hann fékk á sig. Þar af voru nokkur úr dauðafærum.

Vallarþulur Haukanna var í yfirvinnu við að hrópa: „Morkunas,“ enda varði hann hvað eftir annað.

Vísir hefur klippt saman sjö af 22 markvörslum Morkunas frá því í gær, en myndbandið má sjá í spilaranum hér að ofan.