Brenndi af einn á móti markverði og einn á móti marki í sömu sókninni

Rolf Toft, danski framherjinn í liði Víkings, klúðraði dauðafæri á hreint ótrúlegan hátt í Lengjubikarleik Víkings og Fjölnis á sunnudagskvöldið.

Toft, sem lagði upp annað mark Víkinga í 2-0 sigri, komst einn í gegnum vörn Fjölnis þegar sex mínútur voru eftir af leiknum og hefði auðveldlega getað aukið forystu Víkinga.

En Dananum öfluga tókst að klúðra einn á móti markverði og einn á marki með einnar sekúndu millibili. Fyrst varði Þórður Ingason skot hans en Toft tók frákastið og skaut í stöngina af meters færi.

Leikurinn var í beinni útsendingu á Sport TV en atvikið ótrúlega má sjá í spilaranum hér að ofan.