Ryanair ætlar að bjóða 15 dollara fargjald yfir Atlantshafið

Yfirstjórn írska flugfélagsins Ryanair hefur samþykkt áætlun sem felur í sér að bjóða flugfarþegum svo lágt verð sem 15 dollara í flugi milli Evrópu og Bandaríkjanna.

Það verður þó ekki í boði alveg á næstunni en áætlanir félagsins kveða á um að þetta verði gerlegt eftir um 5 ár. Borgirnar sem stefnt er á að fljúga frá í Evrópu eru Dublin, Köln, Berlín og borgir í Skandinavíu, Spáni og Ítalíu. Borgirnar vestanhafs yrðu Boston, Chicago, Miami, New York og Washington og fleiri því í áætlunum Ryanair er stefnan að tengja saman 12-14 borgir í Evrópu og annan eins fjölda í Bandaríkjunum.

Vandi Ryanair að hrynda þessari áætlun strax í framkvæmd er bundin við skort á flugvélum. Rekstur Ryanair hefur gengið vel undanfarin ár og flugfélagið flutti 87 milljón farþega á síðasta ári og hagnaður var af rekstri félagsins. Ef af þessum áætlunum Ryanair verður er þar komin mikil samkeppni við íslensku flugfélögin Icelandair og Wow sem hafa uppi áætlanir um vaxandi flug á milli álfanna.