Af hverju roðnum við af rauðvínsdrykkju?

Margir aðdáendur rauðvíns kannast við það að roðna allduglega þegar þess er neytt en hver er ástæðan fyrir roðanum og er hann merki um eitthvað annað og meira?

Vísindamenn við Chungnam Háskólann í Suður Kóreu komust að því að þeir sem að fundu fyrir hitaeinkennum og roða við rauðvínsdrykkju væru allt að þrisvar sinnum líklegri til þess að vera með blóðþrýsting í hærri kantinum en þeir sem að fundu engin einkenni þessum lík.

Vísindamenn hafa löngum vitað að áfengi eitt og sér hækkar blóðþrýsting. Þegar einstaklingur drekkur áfengi birtast fyrstu áfengissameindirnar í blóðstraumnum eftir aðeins eina mínútu. Um 10-20% af áfenginu er tekið upp strax í maganum. Hinn hlutinn er tekinn upp í meltingafærunum þar sem að ensím brjóta það niður ennfrekar. Fyrst er áfenginu breytt í acetaldehíð en það hefur meðal annars slakandi áhrif á æðakerfið með þeim afleiðingum að æðarnar víkka og blóðflæðið verður greiðara, ef þannig má að orði komast.

Þegar áfengi minnkar svo í blóðinu dragast æðarnar saman aftur og hækkar þá þrýstingurinn á blóðinu. Roðinn myndast hjá þeim sem að eiga í erfiðleikum með að brjóta niður acetalhedíðið og því er það líklegra að þeir sem að roðna við rauðvíns- og aðra áfengisdrykkju eigi hættu á því að þjást af of háum blóðþrýsting.