Guðrún kölluð til Algarve í stað Katrínar

Katrín Ómarsdóttir, miðjumaður Liverpool og kvennalandsliðsins í fótbolta, getur ekki spilað með Íslandi á Algarve-mótinu. Þetta kemur fram á KSÍ.is.

Katrín fékk höfuðhögg í leik með Liverpool á dögunum og hvíldi í fyrsta leik Íslands gegn Sviss í gær. Nú er komið í ljós að hún getur ekki verið með.

Freyr Alexandersson, landsliðsþjálfari, hefur kallað Guðrúnu Arnardóttur, leikmann Breiðabliks, inn í hópinn.

Hún kemur til móts við liðið annað kvöld og verður því með Íslandi í síðasta leik riðilsins á móti Bandaríkjunum og í leik um sæti.