Vörn Bilbao hélt gegn Evrópumeisturunum

Real Madrid tapaði sínum fimmta leik í spænsku úrvalsdeildinni í fótbolta þegar Evrópumeistararnir sóttu Athletic Bilbao heim á San Mamés í Baskalandi í kvöld.

Aduriz skoraði eina mark leiksins á 26. mínútu en þetta var 10. mark þessa 34 ára gamla framherja í deildinni í vetur.

Þetta var í annað sinn sem Real Madrid mistekst að skora í deildarleik á tímabilinu en Athletic Bilbao hefur nú haldið hreinu í fimm leikjum í röð.

Athletic Bilbao er komið upp í 8. sæti deildarinnar en liðið er einnig komið í úrslitaleik spænsku bikarkeppninnar þar sem það mætir Barcelona 30. maí.

Barcelona getur komist upp fyrir Real Madrid í toppsæti deildarinnar með sigri á Rayo Vallecano á morgun.