Alfreð kom við sögu í jafntefli Sociedad

Real Sociedad var að sætta sig við eitt stig á heimavelli í spænsku úrvalsdeildinni í fótbolta í kvöld þegar liðið gerði 1-1 jafntefli við Celta de Vigo.

Agirretxe kom Sociedad yfir á 8. mínútu leiksins með skalla og var staðan 1-0 í hálfleik.

Alfreð Finnbogason kom inn á sem varamaður á 69. mínútu en það var Celta de Vigo sem jafnaði metin á 85. mínútu úr einni af fáum sóknum sínum í leiknum. Nolito var þar að verki.

Þetta reyndist síðasta markið í leiknum og sættust liðin því á skiptan hlut.

Celta de Vigo er í 10. sæti með 25 stig eftir 22 leiki. Real Sociedad er með 23 stig í 12. sæti.