Primera segir upp öllum flugliðum í Svíþjóð

Íslenska flugfélagið Primera hefur sagt upp öllum flugfreyjum og flugþjónum sínum í Svíþjóð í kjölfar þess að bækistöðinni á Arlanda flugvellinum í Stokkhólmi hefur verið lokað. Frá þessu er greint í sænskum miðlum.

Primera boðaði í byrjun janúar til fundar með fulltrúum starfsmanna til að ræða launakjör. Meðal þess sem Primera er sagst hafa krafist af starfsfólkinu var að lækka laun sín til jafns við starfsfólk flugfélagsins í Lettlandi eða um 23 prósent. Þá átti vinnuvikan að lengjast úr 47,5 klukkustundum í 60 klukkustundir.

Nú hefur Primera tilkynnt að starfseminni á Arlanda verði hætt og um leið öllum tuttugu starfsmönnnunum. Primera ber fyrir sig nauðsynlegan niðurskurð hjá flugfélaginu um 30-40 prósent til að geta keppt við önnur flugfélög.

Starfsmenn eru ósáttir og hafa leitað réttar síns en verkalýðsfélagið telur sig lítið geta hafist í málinu. Áður hafði Primera reynt að gera starsmennina alla að verktökum í stað þess að hafa þá á launaskrá.

Uppfært 16.30: 

Flugfélagið Primera hefur komið með ábendingar vegna frétta í fjölmiðlum um fyrirhugaða lokun bækistöðva í eigu flugfélagsins í Stokkhólmi á vormánuðum. Primera þvertekur fyrir að hafa beðið einstaka starfsmenn eða verkalýðsfélag að lækka laun sín um ákveðna prósentu- eða krónutölu og aldrei notað Lettland eða kjör í öðrum ríkjum sem viðmið.

Lesa má tilkynninguna hér fyrir neðan:

Flugfélagið Primera vill  koma að nokkrum vinsamlegum ábendingum og  frekari upplýsingum vegna frétta í fjölmiðlum um fyrirhugaða lokun bækistöðva okkar í Stokkhólmi á vormánuðum.

Fréttir af lokun bækistöðva  eru augljóslega byggðar á grein sem birtist í málgagni sænska verkalýðsfélagsins Unionen.  Greinin er því miður í nokkrum atriðum beinlínis röng eða upplýsingar sem þar birtast mísvísandi.

Primera hefur aldrei beðið hvorki einstaka starfsmenn eða verkalýðsfélag að lækka laun sín um ákveðna prósentu- eða krónutölu og aldrei notað Lettland eða kjör í öðrum ríkjum sem viðmið. Raunar var  launalækkun aldrei nefnd af félaginu á þessum fundi eða öðrum sem hafa átt sér stað. Fundur stjórnenda Primera og Unionen hafði að markmiði að skýra starfsmönnum frá því að vegna breyttra markaðsaðstæðna, efnahagskreppu, gengisfellingar sænsku krónunnar  og aukinnar samkeppni þyrfti félagið að ná fram sem mestri hagræðingu á rekstri félagsins ef halda ætti starfsemi áfram frá Stokkhólmi. Skýringar á þessum breyttu aðstæðum og tilefni funda eru þannig flestum íbúum Svíþjóðar kunnar.

Markmið fundarins var að koma í veg fyrir lokun bækistöðvar okkar í Stokkhólmi  með aukinni hagræðingu og kostnaðarlækkun  og var ein aðaltillagan sú að við skipulag vaktaplans flugliða mætti notast við þann hámarksvinnutíma sem er leyfður evrópskum reglum eða 60 tímar í stað 47,5 tíma. Þess má geta að þessi tímafjöldi hefur nánast einungis þýðingu við skipulagningu vinnutíma og er nánast útilokað að raunvinnutími nálgist nokkurn tíma 60 tíma.  Primera notast við 60 tíma á öllum öðrum bækistöðvum félagsins s.s. í Danmörku án vandræða.   Þessari tillögu var hafnað af verkalýðsfélagi ásamt öðrum hugmyndum félagsins um hagræðingu eða sparnað í rekstri.  Meðalvinnutími flugliða er 20-35 stundir á viku að öllu jöfnu.

Uppsögn starfsmanna hefur farið fram skv. samningum og sænskum lögum og kannast menn hér ekki við að neinar deilur hafi átt sér stað um framkvæmd uppsagna en vissulega eru alltaf skiptar skoðanir þegar svo veigamiklar ákvarðanir eru teknar.

Félagið gerði að auki ekki neina tilraun til að breyta starfsmönnum í verktaka. Fyrir allmörgum árum voru flestir ef ekki allir flugliðar félagsins í Stokkhólmi verktakar en það lagðist af 2009 þegar gerður var samningur við fyrrnefnt verkalýðsfélag.