Rússar íhuga niðurskurð

Fjármálaráðherra Rússlands kallaði í dag eftir því að stjórnvöld í Moskvu skæru niður vegna töluverðrar tekjuminnkunnar. Mögulega munu tekjur Rússlands minnka um 45 milljarða dala, eða tæplega sex þúsund milljarða króna, á árinu vegna verðhruns olíu.

Anton Siluanov, sagði að allir útgjaldaliðir yrðu skornir niður um tíu prósent, að útgjöldum til varnarmála undanskildum.

Þá segir Reuters frá því að Alexei Ulyukayev, efnahagsráðherra, hafi sagt mjög líklegt að lánshæfismat Rússlands yrði fært niður í ruslflokk. Þá telur hann að verðbólga muni ná hámarki í 15 til 17 prósentum í mars til apríl.

Gengislækkun rúbblunnar, lágt olíuverð og viðskiptaþvinganir Vestur-Evrópu og Bandaríkjanna hafa haft mikil áhrif á efnahag Rússlands. Í fjárlögum Rússlands fyrir árið er gert ráð fyrir að olíutunnan kosti hundrað dali, en verðið hefur ekki verið lægra í sex ár og selst tunnan á 46 dali.