Peter Wallenberg látinn

Sænski fjárfestirinn Peter Wallenberg lést á heimili sínu í morgun, 88 ára að aldri. Peter Wallenberg tók sæti í stjórn viðskiptasamsteypu Wallenberg-fjölskyldunnar árið 1969. Hann tók svo við stjórnarformennsku árið 1982 af föður sínum en lét af henni í síðustu viku. Sonur hans, Peter Wallenberg yngri, tók þá við.

Wallenberg-samsteypan hefur í sínum höndum mjög stóran hluta hlutafjármarkaðarins í Svíþjóð og er af flestum talin valdamesta fjölskylda landsins. Samsteypan á hlut í flestum af stærstu fyrirtækjum Svíþjóðar, meðal annars Ericson, Electrolux, ABB, SKF og Atlas Copco.

Frægasti meðlimur Wallenberg-fjölskyldunnar er líklegast Raoul Wallenberg, sænskur stjórnarerindreki sem starfaði í ungversku höfuðborginni Búdapest á tímum síðari heimsstyrjaldarinnar. Milli júlí og desember 1944 bjargaði hann lífi fleiri tugum þúsunda gyðinga með því að hýsa þá og gefa út sérstök vegabréf þeim til handa.