Hvað ertu að bera framan í þig?

Stanslausar auglýsingar um betri og bjartari húð bíða okkar á degi hverjum í fjölmiðlum. Loforðin koma af ýmsum stærðum og gerðum og sífellt er verið að setja ný efni í kremin sem lofa undraverðum árangri á engum tíma. Einhver er þó ástæðan fyrir því að sum krem virka betur á okkur en önnur og gæti galdurinn legið í innihaldsefnunum.

Hyaluronic-sýra

Fjölsykra eða kolvetni sem finnst í líkamanum og þá sérstaklega í húðinni. Líkaminn framleiðir sjálfur kolvetnið en það hægist á framleiðslunni eftir því sem að við eldumst. Hyaluronic-sýran heldur raka mjög vel og hefur verið skilgreind sem náttúrulegur rakagjafi. Að því gefnu gæti þetta verið ljómandi góð viðbót í andlitskremið.

Peptíð

Peptíð eru eins konar keðjur af amínósýrum sem mynda prótín. Peptíð er talið hafa áhrif á húðina með því að hvetja til framleiðslu elastín- og kollagenprótína. Elastín hefur áhrif á þéttni og teygjanleika húðarinnar en kollagen er aðaluppbyggingarefni hennar.

Salicylic-sýra

Salicylic-sýra er náttúruleg og unnin úr plöntum eða trjáberki. Hún er fjarlægir dauðar húðfrumur og kemur í veg fyrir að fitukirtlar stíflist. Sýran er því oft notuð í krem fyrir bólótta húð og hjálpar til við að hreinsa hana og mýkja.



Retinol

Retinol er búið til úr A-vítamíni og er talið auka framleiðslu kollagens en það er prótín sem byggir bandvefi og húð. Retinol virðist hvetja húðina til endurnýjunar og hefur lengi vel verið notað á bólótta húð með nokkuð góðum árangri. Með því að hvetja húðina til endurnýjunar dregur einnig úr sýnilegum öldrunarmerkjum. Gæta þarf þess þó að retinol sé í samvinnu við góðan raka svo að húðin þorni ekki við notkun.



Kóensím eða Q-10

Kóensím er hjálparefni sem finnst í líkamanum og binst hvatberum eða orkubúum frumnanna. Það er þáttur í efnaskiptum sem sjá um orkuframleiðslu líkamanns og minnkar, eins og eðlilegt er, í mannslíkamanum eftir því sem við eldumst. Einhverjar rannsóknir hafa sýnt fram á að kóensímið gæti haft áhrif á útlit húðarinnar og þá sérstaklega skemmdir vegna sólargeisla. Kóensím er einnig andoxunarefni sem hjálpar til við að vernda frumur gegn skemmdum.