Spá 400 prósent vexti snjallúrasölu

Fjölmörg tæknifyrirtæki, eins og Apple, Google, Samsung, LG, Motorola, Sony og mörg fleiri, hafa markaðssett snjallúr á síðustu misserum, en þó hefur markaðurinn ekki tekið við sér eins og þau höfðu vonast eftir.

Greinendur segja þó að markaðurinn muni taka stakkaskiptum á næstu árum og að snjallúr fari frá því að vera eitthvað sem „nördar“ sækjast í yfir í það að almenningur taki þeim opnum örmum.

Með stækkun markaðarins munu fjölmörg smærri fyrirtæki framleiða snjallúr, en þrátt fyrir það segja greinendur að lítið verði um tækninýjungar. Þróun og hönnun snjallúra muni snúast í kringum stýrikerfi sem þegar séu til og getu þeirra. Þar að auki eru snjallúr að verða að tískuvöru í stað raftækja og sem dæmi fékk Apple heimsfrægan hönnuð til þess að taka þátt í þróun Apple Watch-snjallúrsins, sem kynnt var í síðasta mánuði.

„Það er best að horfa á snjallúr sem hagnýtan fylgihlut frekar en raftæki,“ segir Sweta Dash, framkvæmdastjóri rannsókna hjá markaðsrannsóknafyrirtækinu IHS.

Gífurleg stækkun markaðar.

Gífurlegum vexti spáð

Markaðsfyrirtækið Juniper Research telur að markaðurinn fyrir snjallúr muni hafa fjórfaldast árið 2017. Þá hafi 116 milljónir slíkra úra selst, samanborið við 27 milljónir á þessu ári. Þá telja þeir að snjallúrin muni ryðja hlaupaúrum úr vegi, þar sem flestir, ef ekki allir, notkunarmöguleikar hlaupaúra séu fáanlegir í flest snjallúr.

Þó segja þeir að það verði ekki fyrr en árið 2017 sem fleiri einstaklingar muni eiga snjallúr en hlaupaúr.

Rannsakendur IHS halda því fram að árið 2023 muni um 800 milljónir snjallúra hafa komið í hillur verslana, samanborið við 54 milljónir núna í ár. Enn eitt greiningarfyrirtækið segir að sölutölur snjallúra muni hækka um allt að 400 prósent á næsta ári.

Tæknifyrirtæki sjá mikil tækifæri í því að þróa og selja snjallúr sem tengjast sérstaklega snjallsímum fyrirtækjanna. Þannig vonast þeir til að auka mjög tekjur sínar frá sömu notendum. Líklegt þykir að einn af hverjum tuttugu snjallsímum verði tengdur snjallúri innan nokkurra ára.

IHS segir þróun teygjanlegra skjáa vera lykilatriði í þróun snjallúra. Slíkir skjáir hafi þegar opnað nýja möguleika í þróun og hönnun þeirra. Einnig þurfi að þróa skjái sem noti ekki mikið rafmagn. Þannig hefur LG hafið framleiðslu á skjáum sem haldið geta upplausn sinni án orku. Þannig er hægt að draga verulega úr rafmangsnotkun snjallúra.

Þrjú atriði nauðsynleg

Til þess að neytendur taki snjallúrin í almenna sátt og þau geti leyst gömlu góðu úrin af, eru þrjú atriði sem þau þurfa að uppfylla. Getan þarf að vera í lagi. Þar er átt við endingu rafhlaðna og hve öflug þau eru. Þá þurfa þau að líta vel út. Einnig þarf viðmót þeirra að vera þægilegt og þau auðveld í notkun.

Auk þessara þriggja atriða þurfa snjallúr að lækka í verði. Þar til þessi atriði náist að fullu er ekki víst að markaðurinn muni taka það stökk sem greinendur reikna með.