Hafnar ásökunum um Stasi-tilburði í Kópavogi

Næst besti flokkurinn í Kópavogi gagnrýnir að umboðsmaður Sjálfstæðisflokksins, Bragi Michaelsson, óski eftir því við kjörstjórn að fá meðmælendalista annarra framboða. Það lýsi miklu vantrausti á störf kjörstjórnar.

„Leyfum við okkur að efast um að tilgangur beiðni Braga Michaelssonar sé ærlegur heldur séu hér á ferðinni gamaldags aðferðir í anda austurþýsku leyniþjónustunnar Stasi, til þess að stunda persónunjósnir um kjósendur,“ segir í yfirlýsingu.

„Okkur ber skylda til að sjá til þess að meðmælendur og meðmæli með öllum framboðum séu rétt,“ svarar Bragi og útskýrir að listarnir gagnist í kosningaundirbúningnum.

„Gagnvart einstaklingunum sem eru að mæla með er rétt að flokkarnir séu ekki að trufla þá sem eru í öðrum flokkum. Mér finnst engin ástæða til þess að Sjálfstæðisflokkurinn sé að hafa samband við fólk sem hefur mælt með öðrum framboðum,“ segir Bragi Michaelsson.