Ræða tengsl sagnfræði og skáldskapar

Útgáfufélagið Meðgönguljóð og sögubloggið Smjörfjall sögunnar standa fyrir pallborðsumræðum um sagnfræði og skáldskap á Lofti Hosteli við Austurstræti á miðvikudagskvöldið klukkan 20. Þátttakendur eru rithöfundarnir Hallgrímur Helgason, Sigrún Pálsdóttir og Sjón en auk þeirra tekur Sigrún Alba Sigurðardóttir, menningarfræðingur og lektor við Listaháskóla Íslands, þátt í umræðunum. Kári Tulinius rithöfundur og Kristín Svava Tómasdóttir, sagnfræðingur og ljóðskáld, áttu frumkvæðið að viðburðinum og stýra umræðum, hvaðan kom þeim þessi hugmynd?

„Baksagan er einfaldlega sú að við Kristín Svava fórum á pallborðsumræður um heimspeki og bókmenntir í fyrra og datt þá í hug að gaman væri að efna til svipaðrar umræðu um skáldskap og sagnfræði,“ segir Kári. „Við höfðum þetta bak við eyrað og byrjuðum svo að vinna í því að gera þetta að veruleika núna í mars.“

Rithöfundarnir þrír, Hallgrímur, Sigrún og Sjón, hafa öll leitað fanga í sagnfræðinni í verkum sínum en hvert er hlutverk Sigrúnar Ölbu í umræðunum? „Hún var bæði í sagnfræði og bókmenntafræði áður en hún fór í menningarfræðina og hefur skrifað nokkrar bækur um sagnfræðileg efni, þannig að hún er þarna sem fulltrúi sagnfræðinnar. Sömuleiðis eru bækur Sigrúnar Pálsdóttur sagnfræði en ekki skáldskapur, svo allt þetta fólk er á rófinu frá því að vera hreinræktaðir rithöfundar yfir í það að vera hreinræktaðir sagnfræðingar, ef hægt er að vera það. Þetta blandast nefnilega töluvert saman hjá þeim öllum,“ segir Kári. „Það eru þau mörk, hvar á að draga þau og hvað rithöfundar og sagnfræðingar geta lært hverjir af öðrum sem verður útgangspunktur umræðnanna.“

Dagskráin skiptist í tvennt. Í fyrri hlutanum verður umfjöllunarefnið Sagnfræðin í skáldskapnum en í seinni hlutanum Skáldskapurinn í sagnfræðinni. Þau Kári og Kristín Svava flytja hvort um sig stutt inngangserindi áður en umræður hefjast. „Ef við förum ekki allsvakalega fram úr tímamörkum verður svo vonandi tími fyrir spurningar úr sal að pallborðsumræðunum loknum,“ segir Kári.