Ungir bókaormar tala lítið um sinn lestur

„Markmiðið var að öðlast skilning á því hvað gerir börn að lestrarhestum,“ segir Herdís Anna Friðfinnsdóttir leikskólakennari um rannsókn sem gerð var af Barnabókasetri Íslands á Akureyri.

Hún segir niðurstöðurnar gefa mikilvægar vísbendingar um hvernig efla megi áhuga barna á lestri og mun gera grein fyrir þeim á ráðstefnunni Kveikjum eld í Gerðubergi á laugardaginn.

Sjálf starfar Herdís Anna í barnabókadeild Amtsbókasafnsins á Akureyri sem hefur staðið fyrir sumarlestri barna. Rannsóknin náði til barna úr slíku sumarlestrarnámskeiði og viðmiðunarhópurinn var í öðru tómstundastarfi.

„Munurinn milli þessara hópa var einkum fólginn í fyrirmyndum á heimilunum,“ segir Herdís Anna. „Bókaormarnir sjá foreldra og systkini lesa sér til ánægju og foreldrarnir lásu báðir fyrir börnin sem fóru síðan að lesa fyrir sjálfa sig og aðra.“

Anna Herdís telur unga bókaorma lítið tjá sig um bækur og lestur við önnur börn. „Börn sem lesa mikið telja að það sé ekki töff að vera bókaormur.“

Herdís Anna segir börnin kvarta undan skorti á nýjum bókum á skólabókasöfnum. Þeim finnist líka vanta auglýsingar á barnabókum. „Sú hugmynd kom upp að börn kynntu bækur fyrir öðrum börnum í skólunum. Það hefur verið prófað hér á Akureyri og komið vel út.“



Bókaormar eru meðvitaðir um að lesturinn hjálpi þeim í námi, að sögn Herdísar Önnu. Hún segir þá oft velja bækur af kostgæfni.

„Þeir óvönu velja frekar bækur af handahófi og flokka þær eftir kynjum, yfirleitt er það kápan sem kemur inn hugmyndum hjá þeim. Bleik kápa fælir til dæmis stráka frá.

Öllum krökkum finnst nauðsynlegt að bækur séu skemmtilegar og helst vilja þeir framhald því þá er eitthvað sem bíður.

Mörg börn segja mikilvægt að gefast ekki strax upp heldur lesa fleiri blaðsíður en allt gerist svo hratt í öðrum miðlum að sum mega ekki vera að því að bíða eftir að sagan grípi þau.“

Ráðstefnan í Gerðubergi stendur frá 10.30 til 13.30 á laugardaginn. Auk Herdísar Önnu halda rithöfundarnir Yrsa Sigurðardóttir, Davíð Stefánsson, Marta Hlín Magnadóttir og Birgitta Elín Hassell erindi.

Aðgangur er ókeypis.