Meiri olía fundin á Kröflusvæðinu

Norskir fjölmiðlar skýrðu í dag frá olíufundi á Kröflusvæðinu í Norðursjó. Nýfundin olíulind er talin ígildi milli 6 og 19 milljóna olíutunna. Olíulindir á svæðunum Krafla og Askja eru þar með saman taldar geyma 75 til 143 milljónir olíutunna.

Krafla og Askja liggja saman skammt frá svæði sem áður var nefnt Katla. Fyrir þremur árum hætti Statoil að nota Kötluheitið vegna tilmæla frá norsku málnefndinni, sem taldi Kötlu minna of mikið á Ísland. Krafla og Askja hafa hins vegar fengið að halda sér sem nöfn olíusvæða.

Rétthafar Kröflusvæðisins eru Statoil með 50%, Svenska Petroleum með 25% og Det norske með 25%. Í tilkynningu til kauphallarinnar í Osló segir að félögin muni nú meta saman hvernig svæðið verði nýtt í samhengi við þróun annarra olíusvæða í grennd.

Olíufréttamiðillinn Offshore.no segir að staðsetning lindarinnar 22 kílómetra suðvestur frá Oseberg-olíusvæðinu geri samnýtingu með Oseberg líklegustu lausnina með mannvirkjum neðansjávar.