Halldór Björnsson tekur við U-17 ára landsliðinu

Halldór Björnsson hefur verið ráðinn sem þjálfari U-17 ára landsliðs karla í fótbolta. Þetta kemur fram í frétt á heimasíðu KSÍ.

Halldór tekur við starfinu af Þorláki Árnasyni, en hann mun einnig taka við hæfileikamótum KSÍ. Halldór skrifaði undir tveggja ára samning við KSÍ, eða til ársloka 2016.

Í fréttinni á heimasíðu KSÍ koma fram eftirfarandi upplýsingar:

„Halldór, sem hefur lokið KSÍ-A þjálfara gráðu og markmannsþjálfaragráðu, hefur kennt á þjálfaranámskeiðum KSÍ og var í þjálfarateymi A landsliðs kvenna sem komst í 8 liða úrslit í lokakeppni EM Í Svíþjóð 2013. 

„Auk þess hefur Halldór þjálfað á Selfossi í áraraðir, m.a. 2. og 3. flokka karla og kvenna og mfl. kvenna. Þá var hann um tíma í fullu starfi hjá Knattspyrnuakademíu Íslands á Suðurlandi, var í þjálfarateymi mfl. karla há Selfossi þegar liðið lék í Pepsi-deildinni og starfaði síðast sem aðstoðarþjálfari mfl.ka. hjá Fylki.“