Berti Vogts hættur með landslið Aserbaídsjan

Berti Vogts, fyrrum landsliðsþjálfari Skotlands og Þýskalands, er nú einnig orðinn fyrrum landsliðsþjálfari Aserbaídsjan.

Vogts er búinn að segja starfi sínu lausu en hann var landsliðsþjálfari Aserbaídsjan

í sex ár eða frá árinu 2008.

„Vogts sagði okkur því miður að hann sæi ekki að framtíð sín væri með landsliði Aserbaídsjan," sagði í tilkynningu á heimasíðu fótboltasambandsins.  Liðið tapaði 33 af 70 leikjum sínum undir stjórn Þjóðverjans en fagnaði sigri í 15 leikjum.

Berti Vogts er 67 ára gamall en lék á sínum tíma 96 landsleiki fyrir Vestur-Þýskaland og varð heimsmeistari 1974 og Evrópumeistari 1972.  Hann hefur nú stjórnað fimm landsliðum í 230 leikjum sem þjálfari.

Síðasti leikur Berti Vogts með Aserbaídsjan var 6-0 tap á móti Króatíu í byrjun vikunnar en liðið hefur tapað þremur fyrstu leikjum sínum í undankeppni EM 2016 fyrir Búlgaríu (1-2), Ítalíu (1-2) og Króatíu (0-6).

Berti Vogts skilur við landslið Aserbaídsjan í 95. sæti á Styrkleikalista FIFA en liðið var komið upp í 73. sætið í júlí.