Barcelona fór létt með Granada

Barcelona fór létt með Granada 6-0 á heimavelli sínum í spænsku úrvalsdeildinni í fótbolta í dag. Neymar skoraði þrennu í leiknum.

Neymar skoraði fyrsta markið á 26. mínútu en Barcelona gerði út um leikinn rétt fyrir hálfleik. Fyrst skoraði Ivan Rakitic á 43. mínútu eftir sendingu Lionel Messi en Neymar bætti þriðja markinu við á síðustu mínútu fyrir hálfleiks.

Þrátt fyrir að vera 3-0 yfir í hálfleik hungruðu leikmenn  Barcelona í meira og skoraði Messi fjórða markið á 62. mínútu en Neymar fullkomnaði þrennu sína eftir sendingu frá Messi fjórum mínútum síðar.

Messi rak svo endahnútinn á markaveislu heimamanna átta mínútum fyrir leikslok. Barcelona er með 16 stig eftir 6 leiki en Granada er með 8 stig í 8. sæti.