Um 700 skjálftar hafa mælst frá miðnætti

Skjálftavirkni er enn mjög mikil í kringum Bárðarbungu og hafa rúmlega 700 skjálftar mælst frá miðnætti. Mest virkni hefur verið á 15 kílómetra löngu svæði með miðju á jaðri Dyngjujökuls. Sú virkni hefur hins vegar ekki færst norðar í tvo sólarhringa.

Í tilkynningu frá Veðurstofunni segir að stærstu skjálftarnir frá miðnætti hafi verið einn af stærðinni 4,5 í norðurhluta Bárðarbunguöskju klukkan 02:35, annar af stærðinni 4,2 á svipuðum slóðum klukkan 06:18 og sá þriðji af stærðinni 5,4 mældist klukkan 7:03 á suðurbrún Bárðarbunguöskjunnar.

Um tuttugu skjálftar hafa mælst í kring um Öskju. „Spennubreytingar vegna berggangsins gætu skýrt þessa virkni,“ segir í tilkynningunni.

„GPS mælingar sýna áframhaldandi láréttar færslur vegna gliðnunar við norðurjaðar Vatnajökuls. Engar óvenjulegar breytingar hafa mælst á rennsli í Jökulsá á Fjöllum. Það sama á við um aðrar ár sem renna norðvestur úr Vatnajökli.“

Sýni voru tekin úr Holuhrauni í gær og eru nú í efnagreiningu.

Í tilkynningunni segir að ekki sé hægt að segja til um það á þessari stundu hvert framhaldið verður. „Fjórir möguleikar eru taldir líklegastir: 

o Að innflæði kviku stöðvist og skjálftahrinan fjari út og ekki komi til annars eldgoss.

o Gangurinn nái til yfirborðs og eldgos hefjist á ný norðan Dyngjujökuls, jafnvel á nýrri sprungu. Ekki er hægt að útiloka gos með hraunflæði og/eða sprengivirkni.

o Gangurinn nái til yfirborðs og eldgos hefjist á ný en verulegur hluti eða öll sprungan verði undir Dyngjujökli. Gosið myndi leiða til jökulhlaups í Jökulsá á Fjöllum og e.t.v. einnig sprengigoss með öskufalli.

o Gos í Bárðarbungu. Gosið gæti leitt til jökulhlaups og e.t.v. einnig sprengigoss með öskufalli. Mestar líkur eru á að hlaup kæmi niður Jökulsá á Fjöllum, en ekki er hægt að útiloka aðrar hlaupaleiðir: Skjálfandafljót, Kaldakvísl, Skaftárkatla og Grímsvötn.“

Þó sé ekki hægt að útiloka aðrar sviðsmyndir.

Litakóði fyrir flug er áfram appelsínugulur yfir Bárðarbungu og gulur yfir Öskju.