Fimm íslensk mörk í ævintýralegum leik

Viðar Örn Kjartansson heldur áfram að fara á kostum í norsku úrvalsdeildinni í fótbolta.

Selfyssingurinn skoraði þrennu þegar Vålerenga og Viking skildu jöfn í ævintýralegum leik á Viking Stadion. Hann er langmarkahæstur í deildinni með 18 mörk í jafnmörgum leikjum.

Fimm Íslendingar voru í byrjunarliði Vikings í dag; Sverrir Ingi Ingason, Indriði Sigurðsson, Björn Daníel Sverrisson, Jón Daði Böðvarsson og Steinþór Freyr Þorsteinsson, en þeir áttu heldur betur eftir að koma við sögu líkt og landi þeirra.

Simon Larsen kom Vålerenga yfir á 9. mínútu og Viðar bætti svo við marki hálftíma seinna. Indriði sá hins vegar til þess að staðan væri 1-2 í hálfleik þegar hann skoraði á 44. mínútu.

Senegalinn El Hadji Makhtar Thiouné jafnaði metin á 57. mínútu, en þá var röðin komin að Vålerenga.

Viðar kom gestunum yfir á nýjan leik með marki á 61. mínútu og aðeins fimm mínútum bætti síðar bætti Ghayas Zahid fjórða markinu við.

Viðar var ekki hættur og hann fullkomnaði þrennuna á 68. mínútu. Vålerenga skoraði því þrjú mörk á sjö mínútna kafla. En þá sögðu heimamenn hingað og ekki lengra.

Niklas Gunnarsson minnkaði muninn á 75. mínútu og níu mínútum síðar breytti Vidar Nisja stöðunni í 4-5.

Það var síðan Björn Daníel sem tryggði Viking eitt stig með marki á lokamínútunni.

Lokastaðan 5-5 í ótrúlegum leik.

Fyrr í dag gerðu Strømsgodset og Sogndal 1-1 jafntefli.

Belginn Marvin Ogunjimi kom Strømsgodset yfir á 11. mínútu, en Tom Söderberg jafnaði metin sex mínútum fyrir leikslok.