Enn eitt tapið hjá Sandnes

Hannes Þór Halldórsson var á sínum stað í marki Sandnes Ulf sem tapaði sjötta leik sínum í röð í norsku úrvalsdeildinni í fótbolta, nú gegn Odd Grenland.

Markalaust var í leikhléi en á 48. mínútu kom Fredrik Midtsjø Sandnes yfir með sínu fjórða deildarmarki á tímabilinu.

Forystan entist þó ekki lengi því fjórum mínútum seinna jafnaði hinn fertugi Frode Johnsen metin.

Fredrik Oldrup Jensen kom Odd yfir með marki á 66. mínútu og Herolind Shala gulltryggði svo sigurinn með marki á lokamínútu leiksins. Lokatölur 3-1, Odd Grenland í vil.

Hannes og félagar eru enn í botnsæti deildarinnar með tíu stig eftir 18 leiki. Odd er hins vegar í öðru sæti, sjö stigum á eftir toppliði Molde sem á einnig leik til góða.

Seinna í dag fara fram fjórir leikir:

Álasund - Bodø/Glimt

Start - Molde

Sarpsborg 08 - Haugesund

Stabæk - Rosenborg