Plötuumslag Sigur Rósar fyrir brjóstið á Google

Leiðandi tónlistarsíða á netinu hefur nú hulið eitt plötuumslaga Sigur Rósar á síðu sinni þar sem Google álítur það vera of dónalegt.

Á vef Independent segir að umslag plötunnar Með suð í eyrum við spilum endalaust hafi fallið á prófi Google um bann við of kynferðislegt efni, en á umslaginu má sjá afturenda fólks sem hleypur yfir þjóðveg.

Google tilkynnti síðunni Drowned in Sound (DiS) að plötuumslag Sigur Rósar mætti ekki birtast á síðunni, stæði vilji til þess að auglýsingar síðunnar birtust áfram hjá leitarvélinni. OH, plata bandarísku sveitarinnar Lambchop, þykir sömuleiðis vera of dónaleg fyrir Google. DiS treystir mjög á umræddar auglýsingar og hefur nú hafið störf við að hylja myndir af dónalegum plötuumslögum.

Sean Adams, stofnandi síðunnar, segir það furðulegt að Google geti stjórnað efni síðunnar með þessum hætti. Hann spyr hvort Google muni einhvern tímann koma með frekari kröfur sem ógni sjálfu tjáningarfrelsinu.

Með suð í eyrum við spilum endalaust kom út árið 2008.