Umfjöllun og viðtöl: KR - Fjölnir 4-2 | Gary Martin á skotskónum

KR-ingar unnu frábæran sigur á Fjölnismönnum, 4-2, í 16-liða úrslitum Borgunarbikarsins í kvöld. Gary Martin var magnaður í liði KR og gerði tvö mörk en KR-ingar verða því í pottinum þegar dregið verður á morgun.

Leikurinn hófst heldur rólega og voru liðin lengi að komast í takt við sinn leik. Lítið gerðist á fyrsta hálftímanum en það var síðan markamaskína KR-inga á þessu tímabili, Grétar Sigfinnur Sigurðsson sem kom KR yfir á 34. mínútu. Grétar skoraði eftir hornspyrnu frá Óskari Erni en Þórður Ingason, markvörður Fjölnis, náði ekki að hafa hendur á boltanum og Grétar nýtti sér það vel.

Gestirnir gáfust heldur betur ekki upp voru búnir að jafna metin eftir aðeins fjórar mínútur. Þar var að verki Þórir Guðjónsson sem stýrði boltanum í netið eftir frábæra sendingu úr aukaspyrnu. KR-ingar komu strax til baka og skoruðu sitt annað mark í leiknum þremur mínútum síðar þegar Gary Martin skoraði laglegt mark, stöngin inn. Þrjú mörk á sjö mínútum í Vesturbænum og leikurinn galopinn og skemmtilegur. Fleiri voru mörkin ekki í fyrri hálfleiknum og var staðan 2-1 í hálfleik.

Mikið fjör var í leiknum strax í upphafi síðari hálfleiksins og það voru Fjölnismenn sem náðu að jafna metin þegar rúmlega tíu mínútur voru liðnar af hálfleiknum. Þar var að verki Gunnar Már Guðmundsson, sem skoraði laglega með skalla eftir hornspyrnu frá Ragnari Leóssyni.

Gary Martin var aftur á ferðinni fimm mínútum síðar og skoraði hann þá glæsilegt mark. Englendingurinn vippaði boltanum yfir Þórð í markinu eftir fínu sendingu með grasinu frá Gonzalo Balbi.

Þegar rúmlega tuttugu mínútur voru eftir af leiknum fengu Fjölnismenn líklega besta færi leiksins. Þórir Guðjónsson átti þá skot á markið sem var bjargað á línu, ótrúlegt atvik. Þórir átti bara eftir að renna boltanum í autt markið eftir að hann hafði farið fram hjá Stefáni í marki KR. Grétar Sigfinnur aftur á móti renndi sér fyrir markið og fékk boltann í bakið. Boltinn barst þá aftur til Þóris sem átti þá skot í stöngina.

KR-ingar gengu frá leiknum þegar stundarfjórðungur var eftir af leiknum. Þá leit dagsins ljós fallegasta mark leiksins. Gonzalo Balbi lyfti boltanum yfir Þórð Ingason í marki Fjölnis af 35 til 40 metra færi. Balbi var fljótur að átta sig, sá að Þórður var framarlega og skoraði ótrúlegt mark.

Fleiri mörk voru ekki skoruð í leiknum og unnu KR-ingar að lokum öruggan sigur 4-2. Vesturbæingar eru því komnir áfram í bikarnum en dregið verður á morgun.

Grétar markaskorari: Maður verður bara að láta sig vaða„Það er bara mikil gleði að vera komnir í 8-liða úrslit,“ segir Grétar Sigfinnur Sigurðsson, leikmaður KR, efir sigurinn.

„Þetta var erfiður leikur. Fjölnismenn eru skipulagðir og það tók langan tíma að brjóta þá á bak aftur.“

Grétar segir að það hafi kannski verið ákveðin heppnisstimpill á ákveðnum aðgerðum KR-inga í kvöld.

„Það var samt sem áður ekki alveg nægilega gott hjá okkur að fá á okkur tvö mörk úr föstum leikatriðum og við verðum að skoða það.“

Grétar skoraði eitt mark fyrir KR í kvöld og hann hefur verið iðinn við kolann fyrir framan markið í sumar.

„Maður verður bara að láta sig vaða inn í teignum. Þú verður bara að hafa trú á sjálfum þér og vilja skora mörk.“

Ágúst: Mætum út með kassann í næsta leik „Þetta var bara hörku leikur og mikill hraði í honum,“ segir Ágúst Gylfason, þjálfari Fjölnis eftir leikinn.

„Völlurinn var mjög blautur og því varð leikurinn hraður og skemmtilegur. Mér fannst við bara gera nokkuð vel í kvöld og spiluðum ágætlega úr því sem við fengum úr að moða.“

Ágúst vill meina að Fjölnismenn hefðu átt að jafna metin í 3-3 þegar KR-ingar vörðu á marklínu.

„Þetta varð mjög erfitt síðust tíu mínúturnar eftir að þeir höfðu skorað lokamarkið og KR-ingar náðu að sigla þessu heim.“

Fjölnismenn hafa tapað þremur leikjum í röð en Ágúst hefur ekki áhyggjur af því.

„Blaðrar er heldur betur ekki sprungin og við mætum dýrvitlausir til leiks á sunnudaginn gegn Stjörnunni. Við eigum eftir að koma til baka og blása í þessa blessuðu blöðru. Menn mæta út með kassann í næsta leik.“