Rosengård náði sex stiga forystu

Íslensku landsliðskonurnar Þóra B. Helgadóttir og Sara Björk Gunnarsdóttir voru í byrjunarliði FC Rosengård sem bar sigurorð af Umeå á heimavelli í sænsku úrvalsdeildinni í fótbolta í dag.

Therese Sjögran kom heimakonum yfir með marki úr vítaspyrnu á 37. mínútu og sjö mínútum síðar bætti hin þýska Katrin Schmidt öðru marki við eftir sendingu frá löndu sinni, Önju Mittag.

Lisa Lantz minnkaði muninn þegar aðeins tvær mínútur voru liðnar af seinni hálfleik, en Mittag jók muninn að nýju upp í tvö mörk sjö mínútum síðar eftir sendingu frá Kathleen Radtke. Þetta var áttunda mark Mittag á tímabilinu, en hún er markahæst í deildinni

Gestirnir gáfust þó ekki upp og minnkuðu muninn aftur á 85. mínútu, en Ramona Bachmann innsiglaði 4-2 sigur Rosengård á lokamínútunni.

Þóra stóð allan tímann í marki heimakvenna, en Sara fór af velli í uppbótartíma.

Með sigrinum náði Rosengård sex stiga forystu á toppi deildarinnar, en Örebro, sem situr í öðru sæti, á þó leik til góða.

Fyrr í dag vann Eskilstuna United sigur á AIK á heimavelli með þremur mörkum gegn engu. Vaila Barsley, sem lék með Aftureldingu sumarið 2011, skoraði tvö mörk og Elena Sadiku eitt.