Grænfriðungar í aðgerðum gegn Statoil í Barentshafi

Hópur aðgerðarsinna frá Greenpeace-samtökunum klifraði í morgun um borð í borpall á vegum Statoil í Barentshafi. Með þessu vilja samtökin lýsa andúð sinni á olíuleit á Norðurslóðum en borpallurinn, Transocean Spitsbergen, var á siglingu til að hefja borun þriggja olíubrunna, þeim nyrstu til þessa á heimskautasvæðum.

Borsvæðið er um 350 kílómetra norðan við Hammerfest. Statoil segir í yfirlýsingu að það viðurkenni rétt manna til löglegra mótmæla og þau séu mikilvæg í lýðræðislegri umræðu um olíu og iðnaðinn. Aðgerðir af þessu tagi séu hins vegar ábyrgðarlausar og ólöglegar. Greenpeace hafi verið gerð grein fyrir þeirri hættu sem fylgi svona aðgerðum á borpalli fyrir opnu hafi.

Greenpeace segir mótmælin beinast gegn norðlægustu olíuborun á heimaskautasvæði Noregs. Þetta sé 175 kílómetra frá náttúruverndarsvæði Bjarnareyjar. Olíuslys á þessum slóðum geti ógnað heimkynnum milljóna sjófugla. Grænfriðungarnir segjast vera með vistir til nokkurra daga dvalar í borpallinum en á meðan muni skip samtakanna, Esperanza, halda uppi friðsamlegum mótmælum í grennd.

Statoil segir borsvæðið hafa farið í gegnum viðamikið umhverfismat og norsk stjórnvöld hafi opnað það til olíuleitar. Olíuleki sé afar ólíklegur en fyrirtækið sé jafnframt tilbúið með margvíslegar varúðarráðstafanir ef slíkt gerðist. Statoil segist  áhöfn borðpallsins eiga í viðræðum við Greenpeace-félagana um borð.

Samtímis stóð Greenpeace í Hollandi fyrir aðgerðum gegn rússneskum borpalli á vegum Gazprom sem er í höfn í borginni Ijmuiden en hann er á leið til olíuborana í rússneska Íshafinu.