Viðar Örn áfram á skotskónum - sjö mörk í sjö leikjum

Viðar Örn Kjartansson skoraði eitt marka Vålerenga í 3-0 útisigri á Stabæk í norsku úrvalsdeildinni í fótbolta í kvöld. Viðar Örn hefur þar með skorað sjö mörk í fyrstu sjö deildarleikjum sínum í Noregi.

Viðar Örn innsiglaði sigurinn á 66. mínútu leiksins en Vålerenga var þá búið að vera manni fleiri frá 45. mínútu. Viðar Örn og félagar náðu ekki að bæta við mörkum en unnu öruggan og flottan útisigur.

Vålerenga skoraði tvö mörk á fyrsta hálftíma leiksins, fyrra markið var sjálfsmark á 16. mínútu og það seinna skoraði Simon Andreas Larsen á 31. mínútu.

Viðari Erni tókst ekki að skora í fyrsta deildarleik sínum með Vålerenga en hefur skorað í fimm af sex leikjum sínum samtals sjö mörk. Hann er áfram markahæsti leikmaður norsku úrvalsdeildarinnar.