Valsmenn sigruðust á heiðinni en misstu annað stigið til Akureyrar

Eftir endalausar frestanir vegna veðurs fór leikur Akureyrar og Vals í 18. umferð Olís-deildar karla í handbolta loksins fram í kvöld.

Valsarar voru lengi á leiðinni norður en þeir stoppuðu m.a. í Varmahlíð í dag þar sem Öxnadalsheiðin var ófær. Hana tókst þó að opna með herkjum og komst Valsliðið á endanum til Akureyrar.

Þessi ævintýraferð endaði svo með æsispennandi leik gegn Akureyri en liðin skildu jöfn eftir magnaðar lokamínútur, 24-24.

Akureyri var einu marki yfir í hálfleik, 13-12, og var einnig yfir, 17-16, eftir sex mínútur í seinni hálfleik. En Valsmenn skoruðu þá sex mörk gegn einu og komust yfir, 22-18, þegar níu mínútur voru eftir.

Akureyri náði að minnka muninn niður í tvö mörk, 24-22, þegar rúmar tvær mínútur voru eftir og Valsmenn enn með pálmann í höndunum.

En Sigþór Heimisson reyndist hetja heimamanna því hann skoraði tvö síðustu mörk leiksins og jafnaði leikinn, 24-24, og tryggði sínum mönnum mikilvægt stig.

Bjarni Fritzson var markahæstur heimamanna með sex mörk en Finnur Ingi Stefánsson skoraði átta mörk fyrir Val og GeirGuðmundsson sjö á sínum gamla heimavelli.

Valur er í þriðja sæti Olís-deildarinnar með 22 stig, fjórum stigum á undan Fram þegar aðeins sex stig eru eftir í pottinum.

Akureyri er með 13 stig í sjöunda sæti og stefnir í að liðið spili umspilssleiki við lið úr 1. deild um áframhaldandi sæti í úrvalsdeildinni.

Mörk Akureyrar: Bjarni Fritzsson 6/1, Kristján Orri Jóhannsson 5, Sigþór Heimisson 4, Valþór Guðrúnarson 3, Andri Snær Stefánsson 3, Þrándur Gíslason Roth 2, Daníel Matthíasson 1.

Mörk Vals: Finnur Ingi Stefánsson 8/2, Geir Guðmundsson 7, Elvar Friðriksson 2, Orri Freyr Gíslason 2, Hlynur Morthens 1, Guðmundur Hólmar Helgason 1, Alexander Örn Júlíusson 1, Vignir Stefánsson 1, Sveinn Aron Sveinsson 1.

Upplýsingar um markaskorara eru fengnar frá mbl.is.