Launakostnaður Geirs og Þóris 28,2 milljónir

Geir Þorsteinsson, formaður knattspyrnusambands Íslands, og Þórir Hákonarson, framkvæmdastjóri sambandsins, fengu samtals 28,2 milljónir króna í laun á síðasta ári samkvæmt ársreikningi KSÍ sem birtur var í dag.

Launakostnaður starfsmanna á skrifstofu sambandsins nam tæpum 94,5 milljónum króna en ofan á það bættust 21,3 milljónir í launatengd gjöld.

Í tekjublaði DV á síðasta ári kom fram að Geir sé með 1.294 þúsund krónur í laun á mánuði og Þórir 927 þúsund krónur en það jafngildir 26,6 milljónum.

Eins og kom fram á Vísi fyrr í dag var 28 milljóna króna tap á rekstri sambandsins á síðasta ári en kostnaður vegna aukinna landsliðsverkefna fór langt fram úr áætlun sambandsins.