Renault uppfærslurnar virka

Pastor Maldonado ók Lotus bíl sínum einn hring á föstudag og tuttugu og einn hring á laugardag. Liðið var þá komið saman við auglýsingatökur á brautinni í Jerez á Spáni. Lotus hefur þar með notað þá tvo daga sem hvert lið má nota í auglýsingaskyni.

Renault vélin í Lotus bílnum virkaði stóráfallalaust í reynsluakstrinum. Önnur lið sem nota sömu vél, Red Bull, Caterham og Toro Rosso, áttu öll í vandræðum með vélina á skipulögðum æfingum. Svo virðist sem uppfærsla frá Renault hafi virkað vel og hugsanlega er vandinn nú leystur.

Bílinn og vélin voru að vinna vel saman og nýi ökumaður liðsins, Maldonado þykir passa vel inn í hópinn. Liðsfélagi hans Romain Grosjean hefur þó ekki enn ekið nýja bílnum.

Christian Horner liðsstjóri Red Bull segir að ekkert alvarlegt sé að nýjum bíl meistaranna. Vonast hann til að uppfærslan frá Renault leysi þann vanda sem hrellti bílinn á æfingunum um daginn. Þá verður spennandi að fylgjast með Renaultvélunum á æfingum í Bahrein en þær hefjast 19. febrúar.