Umfjöllun, viðtöl og myndir: Valur - HK 48-18 | Þrjátíu marka sigur Vals

Valur gjörsamlega valtaði yfir HK í Olís-deild karla í kvöld, en lokatölur urðu 48-18. Valsmenn leiddu í hálfleik með ellefu marka mun. Þrjátíu marka munur varð svo raunin. Ótrúlegar tölur.

Það var eiginlega ljóst strax frá byrjun í hvað stefndi. Valsmenn komust í 6-2 og síðar meir í 12-4. Þá var eins og gestirnir úr Kópaveginum hefðu kastað inn hvíta handklæðinu.

Gestirnir fengu hvað eftir annað á sig hraðaupphlaup enda sóknarleikurinn í flestum tilfellum slakur og Valsmenn voru fljótir að refsa. Þegar þeir náðu loks að koma sér í færi sá Hlynur Morthens við þeim og það var saga fyrri hálfleiks. Staðan 22-11 í hálfleik fyrir heimamenn og gestirnir gengu brúnaþungir til búningsherbergja.

Veislan fyrir stuðningsmenn Vals hélt áfram í síðari hálfleik. Munurinn einfaldlega óx og óx, og áfram var sóknarleikur HK skelfilegur. Lárus Helgi Ólafsson kom í markið hjá Val í síðari hálfleik og tók hann bara við Hlyni þar sem frá var horfið, en báðir voru þeir með yfir fimmtíu prósent markvörslu.

Lokatölur urðu svo að Valur vann með þrjátíu mörkum, 48-18. Algjörlega kaffærðu gestina sem sáu aldrei til sólar. Andleysið og áhugaleysið var nánast viðvart frá fyrstu mínútu hjá Kópavogsliðinu.

Markmenn Vals voru frábærir. Allir útileikmenn nema einn, Ægir Hrafn Jónsson, náðu að skora og allir meira en eitt mark. Það er fáheyrð tölfræði. Sem dæmi um hversu slakan sóknarleik HK var að spila, er að þeir voru einungis með 44% skotnýtingu gegn 84% skotnýtingu hjá Val.

Með sigrinum fara Valsmenn upp í þriðja sætið, einu stigi á undan Fram sem eru í fjórða og einu stigi á eftir ÍBV sem er í öðru. HK er enn á botninum með þrjú stig. Leikmenn gestanna þurfa að fara í alvarlega naflaskoðun, það er alveg ljóst.

Ólafur Stefánsson, þjálfari Vals: Þetta er bland af tilfinningum

,,Þetta var bara mjög gott. Ég veit ekki alveg hvað gerðist eiginlega. Það voru bara einhver sirkusatriði og læti. Á einn veginn er maður glaður að ná svona toppleik og á hinn veginn er maður bara ennþá stressaðari fyrir leiknum á mánudaginn. Bikarleikur gegn Haukum og það er stórt próf fyrir okkur," sagði Ólafur við Vísi eftir leik.

,,Þetta er jákvætt og við þurfum núna að ná okkur niður og halda fókus fyrir Haukana. Við erum bara strax komnir þangað."

Ellefu af tólf útileikmönnum Vals komust á blað í dag og Ólafur er sáttur með framlag alla leikmanna: ,,Við höldum dampi og keyrum, erum "cocky" og vonandi tekst okkur að halda þessum dampi á mánudaginn. Það verður auðvitað allt annar leikur, miklu meiri þungi í Haukunum, þeir eru efstir og allt það. Það verður bara alvöru leikur."

,,Það er alltaf stórt próf að fá Hauka, FH og þessi lið í heimsókn. Þetta er bland af tilfinningum eftir þennan leik, að fara glaður með það sem maður gerði og við það að einbeita sér af risaleiknum á mánudag."

,,Við ætlum okkur í undanúrslitin. Til þess er þessi leikur víst, vinna hann og komast í Höllina. Það væri frábært, en við erum að fara mæta erfiðum andstæðingum," sagði Ólafur að lokum.

Orri Freyr Gíslason, línumaður Vals: Til hvers að hætta þegar þú ert fimm mörkum yfir?

,,Þetta var mjög gott en við ætlum bara vera rólegir. Það er mjög mikilvægur leikur á mánudaginn.Það gekk bara allt upp í dag og þá fer þetta svona hjá okkur," sagði Orri við Vísi.

,,Við höfum alltaf verið að keyra í bakið á liðunum, en það hefur bara aldrei verið að virka almennilega hjá okkur. Það small í dag og þá bara keyrum á þetta. Til hvers að hætta þegar þú ert fimm mörkum yfir, við höldum alltaf áfram að keyra."

,,Það voru allir fjórtán á skýrslu tilbúnir í þetta verkefni í dag. Markmennirnir skiptu hálfleiknum á milli sín og allir voru að skila inn eitthverju. Þetta var þetta klassíska, liðsheildarsigur."

Valur fær Hauka í heimsókn á mánudaginn, en um risaslag er um að ræða í 8-liða úrslitum Coca-Cola bikarsins. Orri segist Valsara ekkert vera farnir af jörðinni: ,,Nei nei, það er bara æfing hálf níu í fyrrramálið og æfing aftur á sunnudag. Gott vídeó og við erum klárir," sagði Orri galvaskur.

Samúel Árnason, þjálfari HK: Þetta var bara eins og léleg bíómynd

,,Það var ekkert í lagi hjá okkur í dag. Hvorki vörn, sóknarleikur. Við erum að skapa okkur ágætis færi, en erum að skjóta hrikalega illa. Við hlupum einnig illa til baka og það var í rauninni allt sem hefði mátt betur fara," sagði Samúel vonsvikinn eftir leik.

,,Ég man ekki eftir að hafa tapað sem leikmaður með þrjátíu mörkum og þetta er í fyrsta skipti sem það gerist hjá mér sem þjálfari. Ég er virkilega sár."

,,Mér fannst við vera búnir undir það sem Valsmenn voru að fara gera, en náðum ekki að leysa þessar stöður sem koma upp. Þegar blæs á móti þá þarf maður að grafa djúpt, en það var lítið að sækja þangað í dag."

,,Við vorum að slútta illa og þeir komu bara með hraðaupphlaup í bakið á okkur. Ég veit ekki hvað mörg af þessum hraðaupphlaupum voru mörg, örugglega yfir 20. Það segir sig sjálft, það er enginn það lélegur í handbolta að hann geti ekki varist því að hinn geti skorað 20 mörk úr hraðaupphlaupum. Í dag mættu menn illa stemmdir og með litla trú á verkefninu, með lítið sjálfstraust."

Aðspurður hvort botninum hefði verið náð núna, sagði Samúel: ,,Ég ætla rétt að vona það. Þetta er bara einn leikur, leikurinn gífurleg vonbrigði. Þetta er þó bara einn leikur af öllum á tímabilinu, tímabilið hvorki byrjaði né endaði í dag. Það er alveg klárt að við getum lært lítið af svona leikjum. Þetta er enginn mælikvarði á hversu góðir við erum í handbolta, Valsmenn eru ekkert þrjátíu mörkum betri en við í handbolta."

,,Þegar baráttan og mótstaðan er ekki meiri en þetta, þá eru þetta bara 60 mínútur sem þú færð aldrei aftur. Þetta er bara eins og að horfa á lélega bíómynd, þú sérð eftir því leið og þú labbar útúr salnum að hafa borgað þig inn. Við hefðum alveg getað sleppt því að mæta hérna, það er enginn lærdómur af þessum leik," sagði Samúel brúnaþungur í leikslok