Samdráttur í sölu á rakvélum vegna skeggtísku

Sala á Gillette-rakvélum hefur staðið í stað milli tímabila en Procter & Gamble hefur birt ársfjórðungsskýrslu sína. Jon Moeller, fjármálastjóri fyrirtækisins, segir markaðinn hafa skroppið saman á síðasta árfjórðungi síðasta árs.

Financial Times fjallar um málið og eru ástæðurnar sagðar annars vegar aukin notkun á einnota rakvélum og hins vegar vinsældir þess að láta sér vaxa skegg á Vesturlöndum.

Ísam ehf. er innflutningsaðili Gillette-vara á Íslandi og segir Árni Ingvarsson, framkvæmdastjóri sölu- og markaðssviðs, að þessar fréttir komi ekki heim og saman við sína upplifun.

„Þetta er mjög stabíll markaður og þó að menn séu með skegg þá vilja þeir flestir snyrta það,“ segir Árni. Hann bætir því við að marsmánuður sé stór mánuður í sölu, þrátt fyrir hið árlega Mottumarsátak þar sem karlmenn safna skeggi fyrir góðan málstað.

„Þegar ég skoða þetta fjögur ár aftur í tímann sé ég að mars er einn af stóru mánuðunum hjá okkur.“

Rakari í Reykjavík sem Vísir hafði samband við tekur undir með Árna og segir flesta karlmenn nota rakvélar eða sköfur þó þeir láti sér vaxa skegg.

„Það er einn og einn sem leyfir þessu að vaxa en flestir skafa nú á sér hálsinn. Annars hvet ég alla karlmenn til að safna skeggi. Það er þeirra rétta útlit.“