McDonald's ætlar að mala Starbucks

Hamborgarakeðjan McDonald's ætlar að taka þátt í kaffikapphlaupinu og fara í beina samkeppni við Starbucks. Þetta hefur Bloomberg eftir minnisblaði frá fyrirtækinu sem sent var út í gær.

Fyrr í þessum mánuði kynntu forsvarsmenn keðjunnar fyrirætlanir sínar fyrir eigendum McDonald's-veitingastaða og stendur til að gera keðjuna „öfundsverða í augum keppinautanna“, en þar er Starbucks-keðjan fremst í flokki.

Til stóð að breyta þúsundum McDonald's-staða í kaffihús að hætti Starbucks en sérleyfishafar kvörtuðu sáran yfir kostnaði við endurinnréttingar og tækjakaupum. Vinsældir uppáhellts kaffis á McDonald's hafa þó aukist en sömu sögu má ekki segja um aðra kaffidrykki.

Þetta telur Howard Penney hjá fjármálaráðgjafafyrirtækinu Hedgeye vera mistök. „McDonald's er að reyna að vera meira eins og Starbucks. Ég tel að það skaði þá frekar en hitt. Yfirburðir þeirra eru í skyndibitageiranum og það að búa til flókna kaffidrykki gerir lítið annað en að hægja á afgreiðslunni.“