Heimagert rauðkál að hætti Helgu Sig

Heimagert rauðkál er órjúfanlegur hluti af jólamatnum á mörgum heimilum og jaðrar við helgispjöll að dengja niðursoðnu káli úr dós á borðið. 

Ástæða þess að dósakál er yfirleitt á borðum er gjarnan sú að fólki vex matreiðslan í augum. Hún er þó hægur vandi og fyllir húsið þar að auki af jólalegum ilmi. 

Þeir sem prófa heimagert rauðkál með jólasteikinni einu sinni snúa ekki aftur í dósina.

Í matarbiblíunni Matur og drykkur eftir Helgu Sigurðardóttur er að finna einfalda uppskrift að jólarauðkáli.

Rauðkál nr. I

• 1 kg rauðkál
• 50 g smjörlíki
• 2 msk. sykur
• 1 tsk. salt
• 1/2 dl edik
• 1/2 dl vatn
• Saft (Helga tekur ekki fram hvers konar saft en við stingum upp á rifsberjasaft) 

Óhreinu blöðin eru tekin utan af rauðkálshöfðinu og það skorið í mjög litlar ræmur. 

Sykri og salti blandað saman við rauðkálið. 

Smjörlíkið brúnað í potti þar til kálið fer að rýrna og sykurinn er brúnaður. 

Þá er ediki og vatni hellt á og soðið við hægan hita í 2 klst. 

Þá er sykur, saft og edik sett í eftir geðþótta. Borðað með svínasteik og öðrum kjötréttum.

Uppskriftina er að finna á bls. 179 í sjöttu útgáfu af bókinni Matur og drykkur eftir Helgu Sigurðardóttur.