Skjálfti á kínverskum mörkuðum

Lánsfjárskortur hefur skekið kínverska fjármálamarkaði síðustu daga. Fyrir vikið brást seðlabanki landsins við í vikunni og hét stuðningi lendi bankar landsins í vandræðum.

Vextir á fjármagnsmörkuðum Kína skutust upp í lok síðustu viku eftir að lausafjárskorts varð vart á kínverskum fjármagnsmörkuðum. Í kjölfarið lækkuðu hlutabréf í kínverskum kauphöllum mikið á mánudag vegna ótta um að lánsfjárkrísa væri að myndast í þessu næst stærsta hagkerfi heims.

Á mánudag sagði Seðlabanki Kína að nægt lánsfé væri til staðar í hagkerfinu og kenndi óstjórn þarlendra banka um stöðuna á fjármagnsmörkuðum.

Seðlabankinn lagði þó áherslu á að hann myndi styðja við banka í lausafjárvandræðum og tryggja seljanleika á mörkuðum lendi bankastofnanir í tímabundnum lausafjárerfiðleikum. Í kjölfar yfirlýsingar seðlabankans lækkuðu millibankavextir mikið, eða í 5,83% úr 13% fyrir helgi.

Kínversk stjórnvöld hafa að undanförnu reynt að draga loft úr lánsfjárbólu í kínverska hagkerfinu. Greinendur telja það samt sem áður hafa komið bönkum á óvart að seðlabankinn hafi ekki verið tilbúinn til að veita lausafjáraðstoð án tafar þegar fjárþurrðar varð vart á millibankamarkaði. Hann hafi því ekki miðlað nægilega vel stefnu sinni til markaðsaðila.