FH áfram í bikarnum eftir sigur í Hafnarfjarðarslag

FH komst í kvöld í átta liða úrslit Coca Cola bikars karla í handbolta eftir sjö marka sigur á 1. deildarliði ÍH, 26-19, en leikið var í Strandgötu í Hafnarfirði.

Ólafur Björn Magnússon átti frábæran leik í marki FH en hann varði 19 skot þar af þrjú víti samkvæmt frétt um leikinn á handbolti.org.

FH var búið að taka einn markvörð af ÍH þegar félagið samdi við Sigurð Örn Arnarson um að hann kæmi í stað Daníels Freys Andréssonar sem verður frá út tímabilið en FH-liðið átti í miklum vandræðum með Ólaf Björn.

FH var 10-6 yfir í hálfleik en ÍH-liðinu tókst að jafna metin í upphafi seinni hálfleiksins áður en FH-ingar sýndu styrk sinn og kláruðu leikinn með góðum endakafla.

Ásbjörn Friðriksson var langatkvæðamestur hjá FH í kvöld en hann skoraði tíu mörk. Benedikt Reynir Kristinsson og Magnús Óli Magnússon voru báðir með fjögur mörk. Bogi Eggertsson skoraði mest fyrir ÍH eða fimm mörk.