Samkomulag við Íran veldur lækkun á olíuverði

Heimsmarkaðsverð á olíu hefur lækkað umtalsvert eftir að tilkynnt var um samkomulag við Írana um að þeir hægi á kjarnorkuáætlun sinni gegn því að dregið verði úr refsiaðgerðum gegn landinu.

Íranir eiga fjórðu mestu olíubirgðir jarðarinnar en útflutningur á olíu hefur verið með minnsta móti vegna refsiaðgerðanna. Þrátt fyrir að nýja samkomulagið geri ekki ráð fyrir auknum olíuútflutningi, fyrsta hálfa árið í það minnsta, hefur verðið lækkað, ekki síst í ljósi þess að spennan í miðausturlöndum virðist nú minni en oft áður.