Strætisvagn valt á hliðina

Betur fór en á horfðist þegar strætisvagn á leið 78 til Húsavíkur fór á hliðina og út af veginum rétt fyrir klukkan 10 í morgun. Einn farþegi var um borð en sakaði hann ekki. Farþeginn fór í fylgd lögreglu á sjúkrahús til skoðunar.

Vagnstjórinn hlaut áverka og þurfti að kalla út tækjabíl slökkviliðsins til að losa hann úr strætisvagninum. Hann var fluttur með sjúkrabíl til aðhlynningar.

Mikil hálka og krap var á veginum þegar slysið varð og töluverður vindur. Búið er að aflýsa ferð frá Húsavík sem fara átti klukkan 10:30.