Ragnar: Vorum að spila fullkominn varnarleik

Ragnar Sigurðsson, miðvörður íslenska landsliðsins átti flottan leik í markalausa jafnteflinu á móti Króatíu í kvöld. Hann hélt Mario Mandžukić og félögum niðri ásamt félögum sínum í íslenska landsliðinu.

„Það tók á að spila þennan leik og sérstaklega eftir að við lentum einum manni færri. Mér fannst við spila fullkominn varnarleik frá fremsta manni niður til Hannesar í markinu," sagði Ragnar Sigurðsson í viðtali við Hans Steinar Bjarnason í beinni útsendingu Sjónvarpsins frá leiknum.

„Mér fannst dómarinn vera aðeins meira þennan megin. Við vorum alveg að dýfa okkur líka en þá fengum við ekki aukaspyrnu eins og þeir. Ég var ekkert að pirra mig á þeim heldur var dómarinn að fara smá í taugarnar á mér," sagði Ragnar.