Umfangsmiklar bilanir hjá Facebook

Margir notendur Facebook hafa orðið varir við villuskilaboð í dag þegar þeir reyna að skrifa stöðuuppfærslur eða skrifa skilaboð til vina sinna. Aðrir komast alls ekki inn á Facebook síðurnar sínar.

Svona umfangsmiklar bilanir eru sjaldgæfar hjá Facebook en stofnandi síðunnar, Mark Zuckerberg, lét hafa eftir sér fyrir nokkru að þeir væru alltaf í loftinu.

Villuskilaboðunum hefur fækkað eftir því sem liðið hefur á daginn en enn sem komið er virðist eitthvað vera um villurnar.

Fyrstu fréttir af þessum bilunum bárust í gegnum samskiptasíðuna Twitter, þar sem margir Facebook notendur hafa losað úr skálum reiði sinnar yfir bilununum og getað fengið útrás fyrir rafræna samskiptaþörf sína.

Talsmenn síðunnar hafa ekkert tjáð sig um bilanirnar.